گلین ـ حیکایه‌جیک

گلین

 

باشماقلارینی گئیدیییندن بری چؤله چیخا بیلمه‌میشدی. گونون قاپیدان ائوه چالدیغی ایشیغی قیپ قیرمیزی ایشیلتیلارلا قایتاریردی باشماغی. آتاسی دونن آخشام چاغی بازاردان آلیب، قیرخیق اوزونده اوتوران گولوشله قیزینا وئرمیشدی. قیز آتیلیب دوشموشدو. تازا باشماغی چؤلون کیرکثافتینه توخوندورماق ایسته‌میردی. دونو بوراخیب کئچدی اوتاغا. بَی الینی قیزا وئرمه‌میشدی، دونوندان دا توتمامیشدی هئچ. قیرمیزی باشماقلاری ایله گیردی اوتاغا. آرایا آلمیشدیلار بیله‌سینی...

ـ یئددی اوغول ایستَرم.. سونبئشییی قیز گلین!

شالی کیچیک قاینی بئلینه باغلادی. گؤزلَرینده اوتانجلیق دا وار ایدی اوغلانین. گلین بیر بالالی اینه‌گین سؤزو ایله اوتوردو. بَی ده یانیندا. چال چاغیر های هشیر لاپ بئزدیرمیشدی قیزی. گؤزو قاپیدان گیرن ایشیغا، اوردا دوران قوناقلارین اوستوندن کئچیب گلن تازا هاوانین ایشیقلار ایچینده اوینایان توز دنه‌جیک‌لرینده ایدی...