ساده یازماق چتین‌می، چتین یازماقمی ساده؟
شعریمیز چوخالیب، یانی‌سیرا شعر کیتاب‌لاریمیز دا او بیری ادبی ژانرلارا گؤره چوخ یاییملانیب؛ آنجاق شعر کیتاب‌لارینین سایجا آرتماسی، موخاطب‌لرینین ده آرتماسی آنلامینا گلمیر. بونو آذربایجان ادبیاتی ایله یاخیندان اوزاقدان ایلگیله‌نن هر کس بیلیر و گؤرور؛ سؤزومون اثباتیندا کیتاب ساتیش مرکزلرینده قفسه‌لرده توز یئیه‌ن شعر کیتاب‌لارینا ایشاره ائتمه‌یی ده لازیم گؤرمورم.
بوردا بو سارسیجی مساله‌نین عیللت‌لرینه توخونماق و یا بو قونودا چؤزوم یول‌لارینی بیلن بیریسی کیمی چیخیش ائتمک قصدینده دئییلم. فقط، او بایاغی سؤزو، دادی گئتمیش ساققیز کیمی من ده چئینه‌ییب چئینه‌ییب تکرارلاماق ایستیرم: شعریمیزده دیل و دوشونجه چالاچوخورلوغو وار.
دوشونجه‌دن بوشالمیش شعریمیز، آرتیق موخاطب‌لرین بیه‌نیسینی قازانابیلمیر؛ شعرلریمیزده او آن‌لاردان داها خبر یوخدور؛ چونکو او آنی یازیب یارادانلار، یازدیقلارینی گئرچک دونیادا دا یاشامیرلار. شاعیرلریمیزین یاشام طرزی، یئمک رژیمی، موطالیعه‌لرینین مسیری دییشمه‌لی‌دیر بلکه.
بول بول قورولوش و ترکیب یانلیشلیق‌لارینین گؤزه چارپدیغی و یا هر شئیین یولوندا گئتدییینی ساندیغیمیز بیر یازی‌دا، دیقتله سئچیلمه‌میش کلمه‌لره راسلادیغیمیز شعرلریمیزین دیلینده، چکیجی‌لیک عونصورو چوخداندیر اوچوب گئدیب. شخصی دیل شعریمیزین بلاسی اولوب.
هامی کلمه‌لره ایسته‌دییی و خوشونا گلن مفهومو چاتیب بیزده‌له‌ییر، هئچ کس ساده یازمیر، موبهم یازماق بیر اوستونلوک ساییلیر، چتین و آلینما کلمهلر ایشله‌تمک بیر ائپیدئمی اولوب. چیلخا تورکجه آدی ایله، ولی اصلینده باشقا تورک اؤلکه‌لرینده اوخوناجاغی تاماهلانماسییلا ایستانبولجا کلمهلر یاغدیریلیر شعرلره.* اوتای آذربایجاندا یایغین اولان روسجا کلمهلر دوغما کلمهلر کیمی موخاطب‌لره قالب اولونور. حالبوکی بو اثرلر یئترینجه گوجلو اولدوغو صورت‌ده، هم ایستانبولدا اوخوناجاقدیر، هم پاریس‌ده، هم ده باشقا شهرلرده. آنجاق هر یئردن اؤنجه تبریزده اوخونمالی‌دیر بو اثرلر، بوتای آذربایجان تورکجه‌سینده و بو تای آذربایجان کوتله‌سی ایچینده. یئرلی لهجه و کلمه‌لریمیز شعریمیزه یول آچمالی و ادبیاتیمیز مستقل و بؤلگه‌سل بیر کیملیک قازانمالی‌دیر.
شعریمیز هاچان اوغرادیغی بو شخصی سمبولیک دیلین الیندن قورتاراجاق؟ موبهم یازماق نه زامان حاقسیزجا یوکسه‌لدییی بو مسلط موقعیتیندن آشاغی ائندیریله‌جک؟ ساده شعر هاچان او موبارک آددیملارینی ادبیاتیمیزا باساجاق؟ شاعیرلریمیز ساده یازماق خطرینی نه زامان جانلارینا آلاجاقلار؟ شعریمیزین لنگئیستن هیوزلارینی، کارل سئندبرگ‌لرینی، اورهان ولی‌‌لرینی نه زاماناجان گؤزله‌مه‌لی اولاجاغیق؟
بوردا بو سؤزومله ایستانبول تورکجه‌سینی آذربایجان تورکجه‌سیندن آیری توتان بیر باخیش طرزی‌نین طرفلیسی کیمی گؤرونمک ایسته‌میرم. بو سؤزومله تکجه یئره‌ل و بؤلگه‌سل عونصورلارین ادبیاتیمیزدا اؤن پلان‌لارا گتیریلمه‌سیندن یانا اولدوغومو وورغولاماق ایستیرم. ایستانبول تورکجه‌سینین ادبی سؤز داغارجیغیمیزدا نجور گیرمه‌سی قونوسوندا بیر چوخ یازارلار کیمی منیم ده نظرلریم وار.
غفور امامی‌زاده خیاوی
(بو سیرایازیلار ایلک اولاراق اؤیکوموز کانالیندا گئدیب)
- ۹۸/۰۷/۰۸