اوچ چاپ اولموش کیتابلاریمین باشلیقلاری و ساتیش یئرلری:
کیتابلار:
1 ـ قلمه‌قوزان: اون فصله بؤلونن رومان، 1395
2 ـ اولدوزلاردان بیری قایمیشدی: اون‌ایکی اؤیکو توپلوسو، 1395
3 ـ یول آیریجیندا یازیلمیش حیکایهجیکلر: اللی دنه بئش‌یوز سؤزجوک‌دن آز اؤیکوجوک توپلوسو، 1395
ساتیش یئرلری:
1ـ قم: آقای سلیمانی و اؤزوم!
2ـ تبریز: انور؛ بیتیک (رحمانی‌فر)؛ نباتی
3ـ تهران: اندیشه نو (قوسی)
4ـ اردبیل: بهروز؛ منصور
5ـ زنجان: حکیم هیدجی (نعمتی)
6ـ اورمیه: بوتانشر (صبحدل)
یول آیریجیندا یازیلمیش حیکایهجیکلر؛ اَللی دنه بئش‌یوز سؤزجوک‌دن آز اؤیکوجویو اولان اوچونجو کیتابیم ایشیق اوزو گؤردو. کیتاب ایل‌لر بویو (1386ـ1393) یازدیغیم اوچ‌دؤرد سؤزجوک‌دن بئش‌یوز سؤزجویه قدر سای باخیمیندان اولوشان اؤیکوجوک‌لردیر. اؤنجه «قلمه‌قوزان» و «اولدوزلاردان بیری قایمیشدی» باشلیقلی رومان و اؤیکو ژانریندا بوتانشر یاییم ائوی وریندن یاییلدیغی کیمی، «یول آیریجیندا یازیلمیش حیکایهجیکلر» ایسه بو گون چاپدان چیخدی.
حیکایه‌جیکلردن بیری:
«یادیمدا قالان..»
اونوتدوغوم ایستکلر هله ده یادیمدا.
یئنیجه چیخمیش «اولدوزلاردان بیری قایمیشدی» کیتابیمدان «دسمال اوسته سر منی» آدیندا اؤیکو اوقدر باش گؤتوندن وردولار کی داستانا اوخشامادی.. نه ایسه کیتابدا گلدی.. اوخوجولاردان عؤذور دیله‌ییرم.
نه ایسه بوردا اؤیکونون بوتونو خیدمتیزده (بوردان ایسه PDF فرمتینده ائندیره بیلرسیز)!
من..
دسمال اوسته سر منی
گؤزلریم قیزیشیردی آغاجلارین سیرایلا گلیب کئچمه‌سینی سئزه‌رکن. اوزاق داغلارین باشی دا قوشولموش بیربیرینه گئدیردی. سیخیلدیم صندلی‌یه. یانیمداکینین باشی سویروشوب چینیمه دوشدو. توکلرینین قوخوسو خوش گلیردی بیله‌مه. یاستیغی باسیب توکلرینه سوخوردوم بورنومو. دنیز بوزارمیشدی بیز گلندن بری. قاپ قارا ایدی اورتالاری. دارتینیر گئری چکیلیردی. اورالارا باخیر چیپس خیمیرتده‌ییردیک. یئل اسیردی. اوشویوردوک. قول قولا قاییدیب یاتیردیق. دنیزین بده‌نیمیزه سالدیغی اوشوتمه‌دن‌می، یئلین جانیمیزا آتدیغی تیتره‌تمه‌دن‌می، بیربیریمیزی تک تنها اؤز اؤزوموز ایچین گؤردویوموزدن‌می نه‌دن آنجاق آلاهی ترپنه‌جه‌ییمیز قالمیردی و قوجاقلاشیب آزقالا گیریردیک بیربیریمیزه. بئلینی منه چئویریر اویور اویور دورور، هردن داها سیخ سینه‌مه باسیردی کوره‌یینی. دوداغیم قاچدی. گؤزومو یوموب یولا، هاوادا یاییلان دنیزین قوخوسونا، بورولا بورولا اوزانان آسفالتا دوشونور، مئهله‌نیردیم. یوخو باسیردی بیله‌می. اوتوبوس نننی ایمیش کیمی قوجاغینا آلمیش گئدیردی بیزی. هاوادا بولوت وار ایدی.
گؤی اوزو گؤم گؤی؛ بیرر بیرر آغاریردی اولدوزلار. اوزاقلاردا قبیر واردی. یول قیراغیندان آخیب گئدن چای ازلدن اؤیرنمیش هاواسینی چالیردی. دره‌دن آشیب قبیرداشلاری گؤردوم. بیربیرینه سیخیلیب یاتان اؤلولر. دیک دیک یاناشی دایانان باش‌داشی‌لار. اَییلیب سینیخان باش‌داشی‌لار. پیچیلتی وار ایدی هاوادا. قبیرلر اسکی قبیردی. بورالاردا تپه‌گؤز وار. بورالاردا دئو وار. بورالاردا آدام اوتان جاناوار وار. بورالاردا پیچیلتی وار. بورالاردا... های دوشدو. گؤی‌ده بولوت‌لار چاخناشدی. اوزاقدان قایا سسله‌ندی. ایلدیریم شاخدی. گؤی جیریلدی. یاغیش باسدی هریانی. یئره دوشن یاغیش دنه‌لری بیر ده آتیلیب گؤیه قالخماق ایسته‌ییردی. چارپازدان ووروردو. چای ساهمان اولوردو آشیب داشا. ازواق‌دا اولان قبیرلردن بیر گؤز بویلادی منی. توک‌لریم دیک دوردو. بوغازیم توتولدو. اَلیمی قالدیریردیم قولوم گلمه‌دی. دؤنوب قایایا ساری دیرماشدی. یوخ اولدو. قیشقیردیم، سس چیخمادی. بوغازیم دارا دورموش‌دو. بوغولوردوم. بیلدیم یوخو گؤرورم. دورماق ایسته‌دیم. دورا بیلمیردیم. سسیم چیخمیردی. ال آیاق چالیر گوجه‌نیردیم. بوینومو یاستیغا باغلایان سیجیم بوغوردو بیله‌می. الیمی بوغازیما چکیردیم. چیرپینیردیم...
یاغیش شیشه‌یه چیرپیردی. هاوا قارانلیقلاشمیش چیراقلارین ایشیغینی جیزان یاغیش دنه‌لری چارپازدان تؤکوردو. یولوندا ایدی اوتوبوس. اوزون نفس آلیب یانیمداکینا باخدیم، میشیل میشیل. توکلری آلنینی باسمیش شالی سییریلمیشدی. توکلرینی یانا ووردوم. بارماغیمین دالی یاناغیندا گزیندی. زاریدی. سیخیلیب صندلی‌یه منه دؤندو. اوتوبوسون ایچی قارانلیق ایدی. بورنونا یاخدیم بورنومو. دوداغی گولوش کیمی بیر شئی گؤرسه‌تدی. گؤزلرینین آلتیندا قیریش‌لار اولدو. یاناغی شیشدی. اؤپدوم. باشینی چیینیمه قویوب ایچه‌ری ووران ایشیغا باخدیم. یول جومجولوق اولموش سو آخیردی بیز گئدن وَرین ترسینه. بارماقلارینی سیخیردیم اَلیمده. دینمز سؤیله‌مز قیز بیرآزدان دوروب قویمایاجاقدی دانیشام هئچ. آرا وئرمه‌دن سؤزجوک سؤزجوک دوزه‌جک بیربیرینه، اؤتوره‌جک‌دی نازیک دوداقلاریندان. باخاجام. دوداقلاریندان چیخان سؤزلره گولوب باشیمی ترپه‌ده‌جم بیرآزدان.. پنجره‌دن آخان یاش‌لار قبیرلره گؤتوردو منی. اوردان دوروب باخان گؤزلر. اؤزومو گؤردوم شیشه‌ده. گؤزلریمین ایچینده‌کی قارا ببک ترپه‌ندی. اوزاق‌لار قارانلیق ایدی. یومورو شئی گؤزلریمین آغیندا قورخوتدو بیله‌می. باشیمی صندلی‌یه باسدیم. ایلک اؤپوشون دادی سونراسی اوره‌ک دؤیونتوسو بوغازیما قاچیرتدی قانی. اوره‌ییم آغزیمدان چیخاجاق‌دی. عمی قیزیمی اؤپوب، یالاییب گئری چکیلمیشدیم. اوتاغیمین اورتالیغیندا والای وورموش پنجَره‌یه یاخینلاشمیشدیم. گونش قیزاریردی اوندا .. دوداغیم قاچدی بیر آن. توکلری بوینوما ساریلان قیزی گؤروب بوراخدیم الینی. ایلک اؤپوشوم بونون دوداغیندان قارانلیغا گئدن هاوانین اؤرتوسونده کیتابخانانین زئرزه‌میسینه گئدن پیلله‌لرین اوستونده ایدی. گولوشه گولوشه قیقاجی باخان نگهبانین یانیندان اؤتوب چیخدیق بیلیم یوردوندان. دالیمیزدان یانینداکی آداما نه‌سه دئدی. قیزی یوخسا منی سؤیموشدو بلکه!
قیزی گؤتوروب چالوسا بیر ایکی گون تهرانین چیغیر باغیریندان قاچمیشدیم. نه قیزلار اؤپدوم، دیشله‌دیم، چیمدیک‌له‌دیم ایلک آلدیغیم قورخو ایله هیجان ایچینده قیزاران اؤپوشون دادینی آلا بیلمه‌دیم. عمی‌قیزیما گؤرسه‌تدیییم صیفت اوپوش سونراسینی بیله‌سینه زهریمار ائله‌میش زهله‌سی گئدیردی مندن. چئوره‌سینه بئله هره‌له‌نه بیلمیردیم. او ایسینتینی خاطیرلاییر آز قالا کؤکسومو دلیردی چیرپینان اوره‌ییم. ایکی تئرم چکدی یاخینلاشام بیلیم یوردونون قایناشان قیز دولو هاواسینا. ایلک داددیغیم داماغیمدا قالمیش‌دی. آرا وئرمه‌دن بیرینی ایکیسینی دادیر بوراخیردیم. سونوندا یانیمداکی قیز گیردی آرایا. تورکجه دانیشیر، دده قورقوددان، دیوان لغات الترک دان، ماناس دان دئییردی.. تورک‌جه‌دن دانیشدیق، من تورکم او تورک‌دو بس نییه تورکو دانیشمیریق! منه ماراقلی گلدی. تورپاق لابراتوواریندا گؤرموشدوم بیله‌سینی. منیم نمونه‌م یئتمیش ایکی ساعات‌دان سونرا گؤتورولمه‌لی ایدی. گیردیم لابراتووارا. باشقا کیلاس وار ایدی، من ایشیمده ایکن قیزین گؤزلرینی سئزدیم. توکلری آلنینی باسمیش هردن آت کیمی بوینونو قاهاریب گئری وئریردی اونلاری. معصوم معصوم باخماغیمی گؤردو. گولومسوندو. تورپاغیمی گؤتوروب قویدوم دستگاها.
طرح‌لریمی گؤستررکن بیله‌سینه یاخینلاشماسینی سئزدیم بیله‌مه. بیله‌ییندن توتوب چکدیم کیتابخانانین زئرزه‌مییه گئدن پیلله‌لرینه. قیرجانیردی. ساریلدیق بیربیریمیزه.
چوخ دانیشیردی. قوشولوب اؤیره‌نجی‌لره سئچگی قونوسونو توتور بوراخمیردی. تهران چاخناشیر هایقیرماغا گئدیردی. شولوقلوق اولوردو خیابان‌لار. اؤزونو شولوقلوغا حاضیرلاشدیریردی. قولونا یاشیل باغلاییردی. من گولوردوم. قیزغین قیزغین دانیشیردی. دانیشا دانیشا آز قالا آغلاییردی. گؤتوروب چیخدیم تهراندان. چالوسون خیابانلاری دا کم‌پوش قایناشیردی. گئجه‌لری دنیزه گئدیر گونوزلر یاتیردیق. سئویشیردیک. قولونا باغلادیغی یاشیل باغینی دیلیم‌له اوینادیر گولوشوردوک. هله ده دانیشیردی. او دئموکراسی آدلاندیردیغی داوادان من تورک‌جه‌دن، وورولموشدوم تورک‌جه‌یه، وورولموشدوم دیلیمه. برکه دوشه‌نده، «قیزیل گولم در منی... دسمال اوسته سر منی» اوخویور چیمدیکله‌ییردیم بیله‌سینی.
اوزاقلاردا ایلدیریم شاخیردی. بیر یئرلرده گئجه‌نین قوینوندا گیزله‌نن تپه‌گؤزلره دوشونوب یانیمداکی قیزا قیسیلیب سینه‌سینده‌کی قیزیل گولون قوخوسونو آلیر گؤزومو یومورام.
اولدوزلاردان بیری قایمیشدی
یازار: شریف مردی
اؤیکو توپلوسو
ایچینده‌کی‌لر:
1- دیشاری‌می، ایچَری‌می؟
2- یئکه بیر داش کیمی...
3- اؤلوم
4- قاری
5- قیز
6- بوم بوش پارکین گئجه‌سینده
7- جیلخ گئرچک
8- سس
9- دؤرد نفر
10- من (من عاصی..)
11- من (دسمال اوسته سر منی)
12- من (تپه‌گؤز اولسایدیم بئله)
انتشارات: بوتا یایین ائوی
بو کیتابی تبریز (بیتیک؛ نباتی؛ انوربوک)، اورمیه (بوتا یایین ائوی)، اردبیل و قم شهرلریندن الده ائلده بیلرسیز.
یاخین گله‌جک‌ده زنجان، مشکین شهر، تهراندان دا آلا بیلرسیز...
